قولوا رأيكوا بقي

السلام عليكم و رحمه الله و بركاته

ف المره دي هاتكلم عن موقف ضايقني مش عارفه ده احساسي انا بس و لا ليه حق ف الموضوع ده
======================



طبعا زي ما انتوا عارفين بعد اخر شهر اللي هو اجمل شهر ف الكليه ف الضغط بقي و كده و كان اخر تسليم يوم الخميس ف قلت خلاص هاتفرج علي التليفزيون اللي تقريبا كنت باشوفه كده طشاش
كان في علي قناه ام بي سي حفله لأحد المطربين السعوديين بغض النظر عن اسم المطرب بس هو بيغني اغاني كده كده يعني برضه بغض النظر عن كون هي حرام و لا مش حرام بس حفله بقي و هو عامل نيو لوك بقي و المعجبين و المشجعين رافعين علم السعوديه

علم السعوديه اللي عليه كلمه التوحيد مرفوع ف حفله غنائيه فيها اغاني لا تليق برفع علم عليه كلمه التوحيد فيها بسبب ما في الاغاني من......

انا مش عارفه يا عيال اتضايقت اوي علي فكره ده لا تعصب لبلد او كراهيه لأي حد بس يمكن علم السعوديه ليه مكانه خاصه عند اي حد كفايه ان عليه كلمه التوحيد


ايه رأيكم ف الموضوع ده؟

لا حاجه للإعتذار

اختي لا حاجه لتعتذري عما بدر منك في حقي
اختي لا تطلبي مني ان اسامحك
لا تنتتظري مني ان اقول لك اني قد قبلت اعتذارك
لا تنتظري مني اي رد
سوي دمعه عن اي خطأ مني ف حقك او اي لحظه ازعجتك فيها

يكفيني وجودك بجانبي
يكفيني انك تذكرتيني
يكفيني سماع صوتك
لا تقولي لي هل سامحتيني

لا تطلبي مني السماح ف انتي في داخلي اكبر من تنتظري مني كلمه سماح
بل انا من يكون من يطلب السماح

أول خطوة

السلام عليكم و رحمه الله و بركاته

احساس جميل لما تبدأ أول خطوه ف تحقيق حلم حياتك
الأجمل أن تجد من يشاركك أحلامك و يهتم لأمرك و يعينك عليها

ان تجد من يقول لك تعالي معا نحقق أحلامنا معا
لا يهتم لأمره و حلمه فقط بل و ان يكون أفضل منك
بل يريد أن ترتفعا معا و تحققا حلمكما معا
الأجمل ان تجد من ليس له نفس الحلم لكنه يعينك علي تحقيق حلمك

الحمد لله علي وجودك بجانبي يا صديقتي
الحمد لله علي وجود أخواتي بجانبي فهذه نعمه كبيره لا أستحقها
اللهم ادمهم علي نعمه و اجمعني بهم علي خير

زي الورد

ازيكم يا بنات حاسبات زي الورد




طبعا كلنا ف الهم سوا و مش محتاجه اوضح الايام الجميله اللي فاتت دي كانت لطيفه ازاي و حاسين بفرااااااااااغ ازاي و بنااااااام ازاي و بناكل ازاااااااااااي

ام هند بجد انا مش قدرت مش اتكلم بقي خلاص هيجي لي انفجار بس اللي مصبر الواحد ان اخر تسليم ف مشروع هو
Design phase in Software Engineering

اخيراااااااااااااااا بس يارب المعيده مش تطلب ان احنا نعدل فيه حاجه
ااااااااااااامين

امبارح و بعد طول انتظار سلمنا الموقع العبقري بتاعنا اخيرا بعد عذااااااااااااااااب يا دنيا العذاب و الغريب انه عجب الدكتور جداااااا

الحمد لله

هنظبط فيه حاجات و ابعت ليكوا اللينك ان شاء الله

الغريب ان رغم اللي بيعملوه فينا ده ان امتحانات التيرم سبحان الله كده يوم الخميس الجاي

ربنا يستر
يالا اديني عبرت عن حبه مما يجول في نفسي
جامده اوي الجمله اللي فاتت دي
:D

يالا سلاااااااااااااااام

ظروف

السلام عليكم و رحمه الله و بركاته
انا اسفه مش هاقدر اكتب حاجه خالص اليومين دول بامر بظروف مش حلوه
بجد ادعوا لي كتير الفتره دي ان ربنا يعيني

جزاكم الله خيرا

ليلة العيد-1

بجد يا عيال ليله العيد دي جميله اوي كده




ليله العيد اللي فات كان بقي كل عماتي جم عندنا بقي هما و عيالهم حتي اللي عايشين ف اسكندريه و كده فطروا و قعدنا بقي بجد كان يوم تحفه بغض النظر عن شغل البيت اللطيف

بجد كنت مبسوطه كده كلنا مع بعض بقي حتي اللي مش فطر جه بعد الفطار قعدنا كتييير كنت مش عاوزاهم يمشوا بالرغم اني كنت تقريبا باحلم و انا صاحيه

و بعدين كده بعد ما بديت افوق خالتكم الموقره انجي كلمتني كانت عاوزه تنزل تجيب حاجه من نفس الشارع يعني بس كان الساعه 11 بالليل انا بصراحه كان نفسي اوي و بعدين روحت قلت لبابا حبيبي كده علي جنب عشان لو حصلت اي رد فعل مش يبقي علي الملأ عشان عماتي كانوا عندنا
لقيته وافق عادي جدا عشان بس ف نفس الشارع و بعدين انجي جت و رغت مع اختي شويه و بعدين نزلت بقي مع انجي و قابلت اختها كنت بجد مبسوطه اوي
ممكن يبان ان الموضوع مش مستاهل يعني ربع ساعه مش اختراع بس كنت راجعه البيت طاااااااااااايره

حسيت بجد ان انجي كده اختي حسيت بحاجه كبيره اوي ان احنا ننزل مع بعض كده و تكلمني انزل معاها خصوصا برضه ان احنا ساكنين ف نفس الشارع فعلا كنت طاااااااايره و حمدت ربي علي النعمه دي و قررت ان شاء الله ان هي هتكرر كل ليله عيد بس طبعا مش الساعه 11


دا بقي هتعرفوه الحلقه الجايه احم قصدي البوست الجاي ان شاء الله

عيديه

كل سنة و انتوا طيبين و الي الله اقرب و دايما علي طاعه الله ادوم


دي العيديه
يالا عشان مش تقولوا اني حرمتكم من حاجه لازم برضه الواحد يراعي الاطفال

يارب كل عيد و احنا مع بعض

الاخوه

الاخوه



كلمه جميله لا يمكن وصفها كلمه تجعل الانسان يكتفي بوجود اخوانه معه في الدنيا يكتفي بهم و ان وجد معهم في جزيره بعيده عن باقي العالم هم الذين يعطوننا الدفء في حياتنا هم الذين يعينوننا علي الطاعات هم الذين يقفون بجانبنا في الازمات هم الذين يمدون لنا النور لنمضي في حياتنا
الاخوه
هم الذين يعطوننا الامل بأن هناك دائما غد مشرق بعدهم عنا يشعرنا بفقدان شيء لا يمكن وصفه شيء لا يمكن ان نقوله بأفواهنا قربهم منا يشعرنا بجمال الحياه
الاخوه
اللهم ادمهم علينا نعمه اللهم اسعدهم و لا تفرق يننا و بينهم رغم بعد المكان اللهم اجمعنا بهم علي خير اللهم اعنا علي ان نكون ممكن ينصر امه الاسلام و ندخل الجنه زمرا

عندما تعجز الكلمات

احيانا تعجز الكلمات ان تجعل احساسنا يصل لمن نحبهم
نعرف منهم انهم احبونا و يبادلونا الحب لكن احيانا يكون الحب لهم داخل قلوبنا اكثر مما يمكن تخيله او يمكن وصفه
يكون داخل النفس حب كبييييييييير تعجز حتي الكلمات عن التعبير عنه
نكتفي بقولها بأفواهنا لهم و نترك عيوننا توصل لهم باقي مشاعرنا لهم

اللهم لا تحرمنا منهم
انهم احبابنا الذين احببناهم فيك
اللهم اجمعنا معهم في الدنيا و الاخره و ارزقهم السعاده و لا تحرمنا منهم

موقف وحش اوي

امبارح كنت ف موقف سيء اوي يا عيال كنت مش عارفه اعمل ايه ، حسيت ان حد جاب برميل ميه و دلقه عليه
ماحدش يركز ف العربي الفصيح بتاعي:d
المهم اللي حصل اني كنت بعت ميل علي جروب كده و بعدين بنت بعتت لي ميل برايفت ليه انا بس بتسألني علي حاجه
قمت انا بالعبقريه الفذه مش ركزت و افتكرتها بعتته علي الجروب قمت انا رديت علي الجروب
و عاااااااااادي مش واخده بالي و عايشه حياتي بقي
المهم
لقيتها بعد كده جايه تعاتبني عتاب بسيط و هر رقيقه اوي اصلا
بتعابني ان انا بعته علي الجروب و انا باحاول افهم اكتشفت المأساه و اكتشفت ان هي باعتاه لي انا بس

بجد اعتذرت لها كتييييييير بس مازلت حاسه اني انسانه وحشه اوووووووووي
انا اسفه اووووووووووي

kind words

I received these kind words from some of my friends.I liked them very much,i wanted to share them with you
========================
Do you know the relation between your two eyes? They blink together, they move together, they cry together, they see things together and they sleep together. Even though they never see each other......... Friendship should be just like that .!!!!! Life is like hell without FRIENDS.

العشر الاوائل من ذي الحجه

العشر الاوائل من ذي الحجة

روى البــــــــخاري رحمة الله ، عن ابن عباس - رضي الله عنه – أن النبي – صلى الله عليه وسلم – قال : " ما من أيام العمل الصالح فيها أحب إلى الله من هذه الأيام " يعني : أيام العشر. ولا جهاد في سبيل الله ؟ قال : " ولا الجهاد في سبيل الله ، إلا خرج بنفسه وماله ، ثم لم يرجع من ذلك بشيء"

روى الإمام أحمد رحمه الله عن ابن عمر – رضي الله عنه – عن النبي – صلى الله عليه وسلم – قال : " ما من أيام أعظم ولا أحب إلى الله العمل فيهن من هذه الأيام العشر فأكثروا فيهن من التهليل والتكبير والتحميد"

التليفون

السلام عليكم و رحمه الله و بركاته

امبارح يا عيال جيت البيت علي مفاجأه جميله جداااااا ألا و هي التليفون بايظ ، مش فيه حراره يعني
المهم بقي ان الناس كلها ف البيت فرحانه فيه عشان انا اللي باحتل التليفون ف البيت
بابا جاي الصبح بيضحك و يقول لي كده احسن

يالا اهو يومين و هيعدوا ان شاء الله

اخيرا بقي يعني اللي عاوزني يرن لي علي الموبايل او كلمني شكرا و انا لو كنت ف البيت هاتعطف وانا ادخل النت ان شاء الله
شفتوا اتعطف دي جامده اوي صح :d

يالا ادعوا بقي انه يتصلح بسررررررعه عشان انا فعلا حالتي صعبه

ياااااااااااااااه

ياااااااااااااااااااااااااه



الواحد لما بيكون عارفه ان في فتره ف حياته فيها ضغط كبييييييييييييير و فجأه الفتره دي تخلص
احساس جميييييييييييييييييل بالراحه النفسيه و ان الواحد عمل اللي عليه الحمد لله و كله علي ربنا

بس فعلا احساس فظيييييييييع الواحد حاسس انه عاوز:
1- يحمد ربنا "اللهم لك الحمد كما ينبغي لجلال وجهك و عظيم سلطانك، الحمد لله الذي هدانا و ما كنا لنهتدي لولا ان هدانا الله"
2- ينااااااااااااااااااااااااااااااااااااااااااااااااااااااااااام من غير ما حد يصيحه

اللي فعلا بيعين الواحد علي الفترات دي بيكون:
- وجود ربنا سبحانه و تعالي
- وجود الهدف سواء للدنيا و الاخره من العمل
- الاصحاب جزاهم الله عني كل خير

بس للاسف بيكون مستني برضه فتره تانيه زي اللي خلصت ، تقريبا الواحد هسيتني انها تخلص بس شكلها المره دي مش هتخلص غير ف نص السنه :d

بجد جزا الله خيرا كل االي دعوا لي و اللي مش دعي ممكن يدعي تاني

مش عارفه بس بجد ادعوا لي كتييييييييير

صوره

الصوره دي جميله اوي عاملاها واحده من احسن الناس اللي عرفتهم في حياتي ألا و هي

lo2aaaaaaaaaaaaaaa

علي فكره انا حاطاها خلفيه علي زينه، جميله اوي يا ولاء،جزاكي الله خيرا
طبعا طبعا اول حد تشوفوا اسمه هو انا و لازم تشوفوا صورتي و انا متألقه

Quote of the day

As you all see i have e field on my blog called "Quote of the day",Really i didn't change it since about two weeks.I really feel it.I can't change it, each time i try to change it i can't.


All of you gave my life a new taste.Each of you gives me things i miss even in myself.Some of you integrate my,some support me,some hear me a lot,some feel with me even by an eye look.All of you are treasure that Allah gave to me.

Forgive me if i annoyed any of you a day. I am sorry to all. I love you all I hope Allah to gather all of us in Jannah

الشوق

كثيرا ما نشتاق لأشخاص يذكرونا و نذكرهم

نتمني من الدنيا ان نلتقي بهم ، نراهم ،نسمع صوتهم و هم كذلك
لكن

للأسف لا تعطينا الدنيا كل ما نتمني
فلا نجد الإ الانتظار حتي يجمعنا القدر و نكتم الشوق داخل نفسنا
نتمني من الدنيا لحظات تجمعنا
و ان يجمعنا الله في الاخره تحت ظل عرشه

احيانا نكتفي بمكالمه تليفون للحظات

لكن متي اللقاء

هل هو قريب ام بعيد؟

اللهم قرب اللقاء فقد اشتقت لهم و اجمعني بهم في الدنيا و الاخره

قليل من العذر

في كتير من الناس بمجرد حدوث موقف معين يضايقها بتاخد موقف عدائي تجاه الشخص اللي عمل الموقف ده و للاسف الموضوع بيأثر سلبي بعد كده علي الشخص ده و تعامله مع الشخص


ياريت لما تشوف من حد موقف مستفز يضايقك مش يكون اول حاجه انك خلاااااااااص تحطه اللسته السودا و ان الشخص ده مغضوب عليه و تعاملي معاه بعد كده مافيهوش مشاعر خاااااااااالص

ياريت قبل ما ناخد من حد موقف نعمل كذا خطوه:
"علي فكره دي اقتراحات لو حد عنده حاجه تانيه ياريت يضيفها"


1- تشوف الصوره كلها عامله ازاي اكييييييييد في حاجه انت مش شايفها مش عارف ظروف اللي قدامك و بالذات لو انت بتثق ف الشخص ده


انا عن موقف شخصي فعلا كان في بنت كنت معاها ف منتهي السخافه و انا اصلا ف اليوم ده كنت فعلا مش طايقه حد يقرب مني و قفشت معاها كده
هي افتكرت ان ده موقف منها المهم اليوم عدي

و هي كان عندها حسن ظن و جت اتكلمت معاي حكيت لها ظروفي و ايه اللي كان مخليني مش طايقه حد فوجئت منها بكلمه واحده
"انا اسفه انا ما كنتش اعرف كل ده"
بجد ردها ده علمني فعلا هي كانت هتعرف منين غيرلما اتكلم معاها و تحس بيه ا
اكيد لو مش كانت اتكلمت لحسن ظنها بيه كان الموضوع مش مشي كده خااااااااالص


2- لو مش لقيت عذر علي الاقل تطلب منه تفسير للموقف اللي ضايقه
"التمس لأخيك سبعين عذر ، فان لم تجد له عذر فقل لعل له عذر"

مش لازم نمسك لبعض علي كل حاجه ده عمل و ده قال ، نعدي لبعض و لو الموقف تاعبني اوي خلاص اكلمه بس براحه و بأسلوب مش يجرحه و يكون هدفي و انا باكلمه اني اصلح فيه مش مجرد اني ارمي الكلام اللي ف نفسي و خلاص
ياريت نقدر بعض

اكيد التغيير ده مش هييجي بين يوم و ليلية لكن لازم ندرب نفسنا و نفتكر انما العلم بالتعلم
الكلام ده باقوله لنفسي قبل اي حد

يالا كفايه عليكوا كده

لسه

لسه برضه هافضل اقول ليكوا ادعوا لي
انا عارفه اني رخمه بس طبعا طبعا انتوا لازم تستحملوني مش بمزاجكم

لا بجد ادعوا لي كتييييييييييييييييير ان ربنا يوفقني كده
و يريني الحق حقا و يرزقني اتباعه و الباطل باطلا و يرزقني اجتنابه
و انتوا عارفين الباقي بقي

جزاكم الله خيرا

نضحك شويه

هاقول ليكوا حبه نكت تحففففففففففففففه نفك حبه من الضعظ بتاع اليومين دول
و الضحك اجباااااااااااااااااااااااااااااااري


مره اتنين متاخرين على المدرسه الاستاذ بيسال الاول انت ايه اللى اخرك قاله كانت فيه 5 جنيه ضيعه مني وبدور عليها فمسك التانى وانته ايه اللى اخرك قاله أصل انا اللى كنت دايس عليها
=========

مرة واحد غبي حب يطور الطيارة الهليكوبتر فك المروحة وركب بدالها تكييف
===========

مره فى ثلاثه بنات ماشيين فى الشارع واحده بتقول انا عايزه اتجوز واحد يكون له هيبه وشان عظيم والثانيه تقول انا عايزه اتجوز واحد من اليابان والثالثه عايزه تتجوز لاعب كوره مصرى مشهور ، واحد كان ماشى وراهم وسمعهم ام راح يسلم عليهم ويقول انا العميد يونج يانج الشهير بابو تريكا
========

فى مرة اثنين كدابين قوي قاعدين امام الاهرمات الاول قال للثانى تعرف الهرم ده امى هى اللى بانيته فالتانى قاله تعرف البحر الميت قاله اه قاله اخواتى هما اللى قتلوه
=========

واحد بيقول لخطيبته لما ازمرلك انزليلي قالتله:انت جبت عربيه جديده ... قالها:لا جبت زماره ...
========

مرة واحد ندل الهلال الاحمر خصم من مرتبه 20 جنية تبرع لفلسطين قام اتبرع بباقي مرتبه للياهود
========

مرة اتنين مساطيل مذيعة وقفتهو في الشارع سالت الاول ، انت بتحب مصر ؟ قال : اكيد مصر دي امي ..سالت التاني ، انت بتحب مصر ؟ قال : اكيد مش ام صحبي
========

واحد فافى وهو نازل من البيت أمه سالته "رايح فين؟" فقال لها "مش هقولك انا حر" ، نزل ووقف تاكسى فالسواق ساله "على فين يا باشا؟؟؟" قال له يعنى أنا مقولتش لمامي هقول لك أنت"
========

مرة واحد ندل فتح مصنع بيبسي , كتب على العلبة "رج جيدا قبل الفتح"
========

مره دكتور راح مستشفي المجانين علشان يكشف عليهم فرسم لهم باب علي الحائط و قال لهم "افتحوه" فراحوا يفتحوه ما عدا واحد، افتكر أنه عقل و بقى كويس فساله "ليه ما فتحتش الباب" قاله "لأن المفتاح معايا !!؟؟"
========

مره واحد كسلان محكوم عليه بالإعدام ردما فى حفرة فبيقلوله "نفسك فى ايه قبل ما نردم؟" راح قالهم "أشرب قالولوه "اطلع اشرب" راح رد وقال "انا لسه هطلع يا عم اردم اردم!!"
========

واحد راح مطعم في فرنسا.كان عايز يطلب شربه قال للجرسون(جارسوه عايز واحد شوربوه) فالجرسون قاله باردون؟ قال الراجل لا سوخنوه
========

مرة اثنين واحد رزل والتانى تنح الاول قال للتانى علمنى الرزاله قاله اوكى اتصل برقم قال الحاج حسن موجود قاله لا راح اتصل تانى وقال الحاج حسن موجود قاله لا راح الاول قال لتانى انا علمتك الرزاله علمنى التناحة راح اتصل بنفس النمرة وقال انا الحاج حسن محدش سأل عليه
========

مرة دبانة سقطت فى كاس خمرة طلعت تقول وسع للنسر
========

مره طالبه مشاغبه المدرس اشتكاها للمدير المدير بعتلها قال لها "عملتى ايه؟" قالت له "ولا حاحه رميت ورده من الشباك" قال "بس كده؟" قالتله "اه" بعد شويه لقى طالبه مدغدغه ومكسره سالها "ايه الى عمل فيكى كده؟" قالت له "انا ورده الى اترميت من الشباك."

=======================
بس يالا كفايه عليكوا كده بقي روحوا كملوا كفااااااااااااح

احلامي -2

السلام عليكم و رحمه الله و بركاته

هابدأ معاكوا من بدري شويه من حضانه بقي ، طبعا زي ما انتوا عارفين او مش عارفين ان انا كنت ف نفس المدرسه من حضانه لحد 3 اعدادي ، بجد المدرسه دي اثرت ف نفسيتي اوي ، كل ما اعدي جنبها لحد المهارده باتمني يرجع يوم من ايام زمان مش لان دلوقتي حالي اوحش لا قدر الله لا بالعكس انا لقيت حاجات كنت مفتقداها بس ايام الطفوله و ايام زمان مش ممكن تتعوض المهم كنا بقي طبعا انا و احمد بنروح مع بعض و بابا بيوصلنا الصبح و ماما تاخدنا بعد الظهر
ماما بتحكي لي عن الفتره دي اني كنت باروح المدرسه بصدر رحب و بسعاده ف حين ان احمد كان بيعيط و متأثر اوي ، طيبه من يومي طبعا انتوا عارفين
:d
و بعدين ان بقي كان من كتر ما انا متألقه كانت الناس صحابي بيسلوا عليه ف الشارع ، ماما دي استحملت فضايح كتير ام هند بقي كان في مدرسه بحبها جداااااااااااا اسمها ميس سحر مش قادره انسي شكلها لحد دلوقتي ، كانت عسوله اوي ، اتعلمت منها كتير و بالذات ازاي اتعامل مع الناس و الناس يحبوني جت ف يوم اهيء اهيء قلبي اتكسر

كانت هتتجوز و تسافر مع جوزها السعوديه و قالت لنا ان هي هترجع لما نكبر شويه ، طبعا ساعتها كنت انا ف حضانه ف كان اكبر دي عندي مثلا ابتدائي لقيتها بتقول لينا لأه ، لما تكبروا و تبقوا ف الجامعه

كان ساعتها حلمي الوحيد ان ميس سحر مش تمشي و ان تحصل اي حاجه تخليها مش تسافر
كان حلم طفولي مش عارفه ليه حسيت بعد كده انه حلم شرير بس كان ده تفكيري ساعتها و ان هو مش عاوزاها تسافر ن يعني ما تتجوز و تقعد ايه اللي هيحصل يعني
و كانت اول مره احس اني قدامي مشوار طويييييييييييييييييييييييييييل

و بعدين بقي جوزها جه قعد معانا بقي و كانوا زي العصافيرقعدوا معانا ف الفصل نتكلم مع بعض :d
و بعدين بقي ساعتها وسام اختي جت خدتني من المدرسه طبعا ما كنتش طايقاها ساعتها و سلمت علي ميس سحر و مشيت و البنت وسام يا عيني صعبت عليها بقي و خدتني مكتبه و قالت لي هاتي اللي انتي عاوزاه ، البنت اختي دي يا عيني من زمان مستحملاني

==================
كانت دي اول مره افكر ان الدنيا مش ممكن تدي الواحد كل حاجه مره واحده و ان الحياه مش بتقف بمجرد ان حد يبعد عننا و ان احنا ممكن نكمل علي ذكراه علي امل ان احنا نشوفه تاني او نحس بيه معانا ف مواقف حياتنا
علي فكره:
فعلا قابلت ميس سحر تاني و كنت مش مصدقه نفسي ، دا بقي بقي هتعرفوه المره الجايه ان شاء الله

احلامي - 1

السلام عليكم و رحمه الله و بركاته



كنت من فتره كده بعتت اني هاكتب مذكراتي عن احلامي الورديه ايام البراءه ، قصدي قبل دخول الكليه

ام هند ، طبعا زي ما انتوا عارفين انا عندي اتنين اخوات ربنا ما يحرمني منهم :
احمد اخويا ، بمعني اصح توأم بس هو اكبر مني بخمس دقايق
وسام: اختي الكبيره العاقله الرزينه و هي العانم متجوزه و عندها مصيبتين قصدي بنتين بانسيه و ياسمين ، ما علينا من الجنينه اللي هي عاملاها ف اسامي العيال دي

هابدأ معاكوا من ابتدائي كده و هاعدي بسرعه ، هاقول بس المواقف اللي اثرت ف نفسيتي

العد التنازلي

بدأ العدد التنازلي
باقي من الوقت ساعات و تيجي الساعه المنتظره الا وهي
-
-
-
-
امتحان ال
Organization

عارفين اللي مش هيدعي مش عارفه هاعمل ايه و اللي هيدعي يا حلوين هاجيبله هديه فظيعه و طبعا انتوا عارفين الهدايا الكبييييييره بتاعتي اللي دايما باقول ليكوا عليها بس مش باجيب حاجه
:d

كل الاقسام التانيه تدعي اقسم علوم الحاسب و علوم الحاسب يدعوا لبعض و ربنا يتولاهم برحمته

دعااااااااااااااااااااء ارجوكم

السلام عليكم و رحمه الله و بركاته


بصوا يا أحسن بنات في الدنيا عاوزه كل واحده فيكوا تدعي لي الفتره اللي جايه جامد اوي عشان بجد الايام اللي جايه ربنا يعديها علي خير و فعلا عندي حاجات كتيييييييييييييييييييييييير

عاوزين ندعي لبعض بظهر الغيب ، كلنا ندعي لبعض و بالذات ف الفجر
بجد عاوزه دعاء كتيييييييييييييييييييييييييييييير
بحبكوا يا بناتييييت

بناء علي طلب الجماهير

السلام عليكم و رحمه الله و بركاته

دي صور اطفال كنت نزلتها بناء علي طلب أحد الجماهير :d:d

لو كانوا يعلمون

السلام عليكم و رحمه الله و بركاته

دي يا اولاد مواعيد برنامج لمصطفي حسني جميييييييييل اوي بييجي علي اقرا

بيحكي عن القصص اللي ف القران و ازاي ان احنا نستفيد منها ف حياتنا عشان نعيش سعداء و ف نفس الوقت نعمل لنصر الامه

مستنيه رأيكم

فريده

السلام عليكم و رحمه الله و بركاته

كله يوسع .... بس مش هنرش ميه المره دي
لكن
يا ولاد فريده جت
مين فريده بقي طبعا عاوزين تعرفوا :d
فريده هي بنت بنت خالي

يعني هو فريده ممكن يتغير بس الاسم ده بناء علي طلب اخت فريده الكبيره ليلي
ليلي دي يا ولاد فظيييييييعه حته بنت زي السكر
اكيد طبعا طالعه لي:d


الصوره دي اكيد مش صوره فريده عشان انا اصلا لسه مش شفتها

حب

حب الرسول صلي الله عليه و سلم

مش عارفه ليه لما جيت اكتب و باكتب عن موضوع حب الرسول حسيت اني مش قد اني اكتب عن الرسول صلي الله عليه و سلم

مش قد اني اكتب عنه

خير البشر

رحمه ربنا للعالمين
شفيعنا يوم القيامه
اخر الانبياء
حبيب الرحمن

بس هاحاول اوصل جزء من احساسي و الكلام ده باذكر بيه نفسي قبل اي حد يارب يوصل
كنت سمعت كده من كام يوم كذا موقف فعلا حسسوني ان حب الرسول صلي الله عليه وسلم اغلي حب ف حياتنا ، أغلي من حبنا لأهلنا و حبنا لنفسنا و كل حاجه ممكن نحبها مع ان الحاجات دي حبها مش حرام بس مش يكون اكتر من حبنا للسول صلي الله عليه و سلم

1- للرسول صلي الله عليه و سلم عند ربه دعوه مستجابه اخرها الي يوم القيامه ليدعوها لنا لندخل الجنه:
نتخيل كل واحد فينا لو فكر يدعي ممكن يدعي يقول ايه و يفتكر حبه صلي الله عليه و سلم لينا

2- كان يجلس صلي الله عليه و سلم مع الصحابه فبكي، فسألوه ماذا يبكيه فقال : اشتقت لإخواني
قالوا: أولسنا اخوانك
قال : لا أنتم أصحابي، اخواني قوم يأتون من بعدي يؤمنوا لي و لم يروني
هو صلي الله عليه و سلم يشتاق الينا و احنا ساعات كتيير حتي ممكن مش نوفيه حقه من الصلاه عليه في اذكارنا

3- كان يجلس مع الصحابه فاخبرهم ان اجر الواحد منا بخمسين منكم
فقالوا: بل منهم
فقال: لا بل منكم، تجدون علي الخير أعوانا و لا يجدون علي الخير أعوانا
يعني هو حاسس بينا و ان الدنيا فيها مصاعب و مغريات كتير

جزاه الله عنا كل خير
اللهم اجمعنا معه في الفردوس الاعلي
اللهم أعنا علي نصره دينه
اللهم فرحه بنا و اسقنا من حوضه
صلي الله عليه و سلم

الان يا عمر

موقف اثر ف نفسي اوي بين سيدنا عمر بن الخطاب و النبي صلي الله عليه و سلم احببت ان نتشاركه معا و نتشارك الخواطر في هذا الموقف المرات الجايه اللي هابعتها ان شاء الله

====================

فبينما النبي صلي الله عليه و سلم يمشي مع مجموعه من الصحابه ، امسك النبي بيد سيدنا عمر
فقال له عمر: اني أحبك
فقال له النبي: أكثر من ولدك يا عمر
فقال له عمر: نعم يا رسول الله
فقال له النبي: أكثر من أهلك يا عمر
فقال له عمر: نعم يا رسول الله
فقال النبي: أكثر من نفسك
قال عمر: لا يا رسول الله

هذه قمة الصدق و الوضوح

فقال النبي: لا يا عمر، لا يكتمل ايمانك حتي اكون أحب اليك من نفسك التي بين جنيك

فانزوي عمر جانبا يفكر ثم عاد يقول : يا رسول الله ، و الله أنت أحب الي من نفسي التي بين جنبي
فقال له النبي : الان يا عمر

اي الان اكتمل ايمانه

ذهب اليه ابنه عبد الله بن عمر يسأله عن سبب هذا التحول المفاجيء في مشاعر قلبه
فقال له: يا بني جلست اسألأ نفسي:

الي من أحتاج.. الي نفسي ام الي رسول الله؟ تذكرت اني كنت في الضلاله و في الظلمات و لولا ان جعل الله رسوله سببا لما امنت

ثم تذكرت اني اتي يوم القيامه لا استطيع بلوغ الفردوس الأعلي الإ بحبي رسول الله صلي الله عليه و سلم فوجدتني احتاجه أكثر من نفسي فأحببنه أكثر منها

=================

اللهم اجمعنا مع النبي صلي الله عليه وسلم و الصحابه في الفردوس الأعلي
ااااااااااااااااااااامين

منقول من كتاب: عمر بن الخطاب، سلسله الخلفاء الراشدين للاستاذ عمرو خالد

احلام

زماااااااااان .. زمان و انا قصير ...كنت باحلم ابقي طويييييييل ابقي طوييييل

المهم الحمد لله حيث ان الواحد معجب بطوله مع الإعتذار لباقي الأطوال

ام هند و فتحي علي رأي خالتكم ايات



يالا ارغي لكم شويه و احكي لكم حبه كده من احلامي قبل ما ادخل الكليه و الحمد لله و لا حاجه حصلت عشان كان ولا حاجه منهم ليها علاقه بالكليه و كانت شخصيتي مش كده يعني و طريقه التفكير العبقريه طبعا كانت مش كده بس الحمد لله لقيت احلام ممكن تكون احلي من اللي فاتت.
ممكن لو طولت يعني اكتبها علي كذا مره و اهي يالا تبقي مذكرات هو الواحد شويه ف البلد دي و لا ايه يا ناس و طبعاااااااااا لازم هتقروها يا حلووووين

استنوا بقي تشوفوا العجب يا اولاد

Flowers

I love flowers very much especially red flowers,this is a collection of flowers that i like :D.Some i got and others are gifts from my lovely friend Yasmen :x

What is your opinion about them? ;;)

احساس

احساس غريب لما تحس انك مش عاوزه تتكلم مع شخص معين
عاوزتلزم الصمت الرهيب
ممكن اللي قدام يفهم ان انك مش عاوزه تتكلم معاه عشان متضايق منه
و انت مش عارف انت اصلا متضايق و لا مش متضايق
كل اللي جواك بس

انا مش عاوز اتكلم

عتاب المحبه

الميل ده عجبني اوي

***************************

"العتاب على قدر المحبة"

ولكن العتاب لا يكون أسلوبا فعالا إلا اذا استخدم في الوقت المناسب ومع الشخصيةالمناسبة التي تتقبل العتاب اللطيف بصدر رحب .

وحتى لا تخسر أصدقاءك من عتابك لهم ، نقدم لك فيما يلي نصائح في هذا الشأن :

1- حدد عتابك :

فلا يجب أن يزيدعتابك على حد معين ، ولا تحول كلامك لنوع من التوبيخ، ولا تكرر ما تقوله ولا تلح كثيرا ويقول المثل

( ( خير الكلام ما قل ودل )) حتى لا يتحول كلامك لنوع من الهجوم غير المحبب .

2- لا تتهاون :

بينما لا يجب ان يزيد عتابك عن حد معين ، يلزم أيضا أن لا ينقص عن الحد الذي يجعله فعالا ، فالتهاون أحيانا يؤدي إلى استسهال الأمر من قبل صديقك ،ومن ثم يتمادى في عدم مراعاة ما يضايقك

3- لاتوجه اتهاما مباشرا :

فلا يجوز ان تضع صديقك موضع المتهم ، فتضطره للدفاع عن نفسه بطريقة تبدو وكأنه يبرئ شخصه من تهمه مؤكدة ،فذلك يوغر صدره تجاهك وربما تخسره جزئيا او كليا .

4-ضع النقاط على الحروف :

عندماتعاتب صديقك حدد بدقة الأشياء التي تضايقك منه ، بمعنى ان تضع النقاط على الحروف ،مع التأكيد أثناء عتابك أنك باق على صداقته ، وأن عتابك ما هو إلا من باب البقاءعلى الود القديم .

5- كن مهذبا :

فلا تستخدم أبدا كلمات خارجة عن الأدب ، وانتق ألفاظك بعناية، حتى لا تجرح صديقك فلا يعود ينسى كلماتك .

6- كن هادئا :

لا ترفع صوتك ،وتكلم بهدوء ودون انفعال وتذكر انك تعاتب ولا تتشاجر .

أول مرة

السلام عليكم و رحمه الله و بركاته


دي اول مره اكتب علي البلوج
بعد ما لقيت كل الاصدقاء التكنولوجيا واخده حقها معاهم ف قلت يالا انا كمان الحق لي حاجه

طبعا لازم أواكب التكنولوجيا مش حاسبات بقي:d

يالا يا بنات حبيت بس اسلم عليكم و مش احرمكم من طلعتي البهية
و بعدين كفايه عليكم كده

بحبكوووووووووا